(رمضان جه يا ولاد)
عامية مصرية
لمحمودمطر
الشارع زحمة موت والناس في الشارع كلها نازله
تقولش يوم الحشر ولا صابتهم حمى ولا جات لهم نازله
سألت واحد ليه الشارع كدا ياعم كدا زحمه
قال لي بكره رمضان كل سنه وانت طيب وبيقولوا الحاجات أسعارها كمان نازله
قلت له يا عم دا التجار في انتظار رمضان وكيف الاسعار بتقول كمان نازله
دا بيضربوا السعر في خمسة حتى لو صنف مالو كمان لازمة
مشيت ابص في الشارع الاقي كل الناس على ايديها كمان شايله
وكأننا في مجاعه وكل واحدة محملة وبالتكسي كمان شايله
سكر تلاقي وفول وبيض وعدس وبامبرز وورق وحاجات كتير والله ما كمان لها لازمه
والتجار اعلاناتهم على تفليس الجيوب كل يوم نازله
وادي اعلان بيقول يا تلحق يا متلحقش بكره السعر هيرفع أو يكون أزمه
ودا اعلان يقولك خفضنا السعر عشان تجهز فطارك وتعمل كمان حافله
هو دا شهر المجاعه ولا الناس امخاخها كمان قافله
مره كنت بتسوق جبت تلاته كيلو لحمه وخمسة تفاح وموز وقفص طماطم وخمسه كيلو بصل وجيت أحاسب لقيت الحسبة مش سهله
وجمبي واحد امركاني عنيه زرقه واخد تفاحه وموزه كمان واحده
وشريحة لحمه وبصلايه كمان واحدة وشريحة بطيخ كمان واحدة
ولما جه يحاسب حاسب كمان فكه
وقفت وبصيت لنفسي لقيته طبخ زيي وحلا بفاكهه وما ورط نفسه في حسبه مش سهله
قعدت أضرب كف بكف وانا شايل ومحمل وجارر وهو في كيس صغنن
حتى الحمول سهله
و ام حسين جارتنا كل سنه تدق خناقه على أمور مالها كمان لازمه
اصل ابو حسين ما جاب الياميش وهي على الطلاق السنه عازمه
تروح عند الجزار تلاقي الناس بالدور تقولش هي اللحمةفيها ازمة
وزحمة عند السكر والدقيق والزيت حتى على بتاع العرقسوس هجمه
والا على بتاع الطرشي تقولش يوم القيامة ولا الحاجة أم فلفل للطرشي بالزبدة كمان عامله
تقولش رمضان شهر مجاعه والبطون على الخراب عازمه
ايه يا خلق ددا شهر للصيام ما هو شهر نعمل فيه كمان ازمه
والله دا انا باكل ربع بطني وبعد كدا كل الأكل اقول ما كان لو لازمه
وبالليل أهلا بالسحور الواحد قاعد يحشر في بطنه حادق وحلو ومافي مانع طبيخ والصبح تيجيله كمان نازله
وعلى اخر رمضان يزيد الوزن واجري على الجم اصل الكروش على البنطلون نازله
ناهيك عن اللي جاله سكر من اكل القطايف والكنافة والمهلبية اصلها اكلات ما كانت عمرها سهله
ويمر رمضان والواحد يطلع منه مديون اصل الحسبه فيه فاشلة
محمود مطر