ملك
الزبادي
للبلياتشو !!
بالورقة والقلم هاكتب تاريخ ميلادي
وشعاري يكون علم مصري ومصر بلادي
بالعلم والعمل هابدأ تاني حياتي
أرسم طريق أمل. ب جسور من الأيادي!!
خيرك يا بلدي فين. خيرك وخير أجدادي
بدل الرئيس اِتنين نَسُووونِي أمجادي
سلاطين حكام كتير كانوا ضمن الأعادي
عِرْفُوا إن شعب النيل يوم الغضب مش عادي!؟
عايش زمن الحسين ساكن حي المعادي
بيقول أنا مش بوتيين وبصوت حنون بينادي
لا ماركس لا لينيين لا نازي لا ساداتي
طيب سيادتك مين طبعًا ملك الزبادي !؟
أسعار الليل تتغير الصبح تبقى فقير
والنور أحواله تِحَيْر والعتمة لينا بديل
رغيف العيش اِتغير نملة ف بُقْ الفيل
الكُل معايا يِشَيَرْ لازم حتمًا تغيير!!
أنا جيت الدنيا مُخَيَرْ مش مجرم حرب أسير
مش فارقة كبير وصُغَيَر اِلْرَكْ ع التفكير
أفكاري فيها حكايتي وحكايتي للتنوير
تكتب أقلامي نهايتي ونهايتي لازم أطير
شُخْلِيلَة للعيل مصاصة للبنوتة
عيشها واتخيل إن الحياة مظبوطة
البيضة يا مِنَيِلْ على خمسة مربوطة
والكوسة تِتْخيلْ أغلى من القوطة
يا ابو العيال مَيِل وهات كذا فوطة
نبكي ونْرَيْلْ وكُلُهُ ع النوتة !!
صوت الشعوب محبوس. صوت الحقيقة اِتحاش
ماسكات كتير ووشوش. راح الغضب ولا جاش
وارجع واقول من تاني
مين في الحياة مَتْعِبْشْ عاش وكان راضي
مين فيها متكلمش وكلامه بقواضي.
مين فينا مستسلمش من خوفه بيطاطي!؟
الكُل متعلمش إن الزمن ماضي
نرجع نقول معلش بصوت مكسور وواطي
للدنيا ماسك ووش وحقيقة للعاطي
ف زمانا كِتِر الغش بكلام مَطَاطِي
الكُل نِفْسُه ف عش والعش كان فاضي
اُسكُتْ ومتكملش خلي السُكات قاضي!!
شعر عامي
للبلياتشو
وليد حسانين
" القاهرة ..مصر
١٣/١٠/٢٠٢٣
وليد عوض إبراهيم حسانين/
