إنسان عصامى. . تأليف / ناصر يوسف عيسى
انا بنيت نفسى بنفسى وكلامى بقوله للكل والسَّامعين
ماحدش ساعدنى فى حياتى ولكن ربك كبير ومعين
وبسببه عرفت المحبة لأهلى حتى والحاقدين
عمرى ما عرفت غش ولا كدب ولا خداع
ولا عمرى كنت ف حديثى يا ناس لوَّاع
وبحب عمل الخير و الحق عندى مشاع
انا كنت معلم كبير وعال العال وعلمت كمان أجيال
إيه اللِّى غير الناس يا ناس للأسوء وبدل الأحوال
الطالب أصبح جرئ وفعله مش برئ وبيعمل الأهوال
ياترى تدهور المناهج ونقص المباهج هى سبب المصايب
ولاَّ صحبة السوء والأهل ودور الأب فى بيته غايب
ولاَّ حال الناس وقلة الإحساس بتعمل كل العجايب
فين المناهج اللِّى كانت بتزرع فينا المبادئ وتفسر القرآن
فين الأصول اللِّى كانت بتعلمنا المحبة مع اختلاف أديان
فين القيم اللِّى تاهت وأفرزت مطربين وفنانين بينشروا العصيان
القصد ربنا موجود وقادر فى لحظة حالاً يبدلها
ويبعد عنا كل حقود وحسود ويبعد اللِّى بهدلها
وينشر بيننا المحبة و حبه حبه للأحسن يعدلها
