➖➖➖➖➖➖➖➖➖➖➖➖
رصاصة — وأب — وأم — وأبن
————————————-
أب بيخاطب الرصاصة ... بيقول
➖➖➖➖➖➖➖➖➖➖➖➖
( الأب ) قوليلي يارصاصة ........؟
لما كنت في قلب إبني
هو إتوجع ولا مات
لو كان إتوجع
مانا ماسمعتش منه أهات
ولو كان مات ماحنا
ماتعودناش منه علي السكات
كانت ضحكته
ماليه الشوارع والحارات
وأخواته البنات
مين إل هايشقر عليهم
في المواسم والأعياد
➖➖➖➖➖➖➖➖➖➖➖➖
( والأم ) قالت لإبنها
كان نفسي يابني أفرح بيك
والولد مات في حضنها
ياحرقة قلبي يابني عليك
ماهي أمه وهو إبنها
بتحبه وهو كمان بيحبها
وكان نفسها يتجوز
وتشوف منه حتتين عيال
ولد وبنت من صلبه
حلوين جمال
وأبقي جد وأبوك يبقي جد
ماهو أعز الولد ولد الولد
لكن رصاصة الغدر
ماجاتشي في قلبك
دي جت في قلبي أنا
مانت يابني لسه صوغير
يعني عندك كام سنه
هو يابني حاجة أغلي من الضنا
➖➖➖➖➖➖➖➖➖➖➖➖
( الإبن ) صرخ صرخة
وكانت صرخته قوية
قالها يامه ماتبكيش ولا تعيطيش
كان نفسي أعيش
ماشبعتش منك حنيه
القلب مجروح
وساعة طلوع الروح
إدعيلي يامه ربنا يهون عليا
ماتبكيش عليا يامه ماتبكيش
ماتبكيش
لو قالوالك إبنك مات ماتبكيش
وأفرحي يامه وزغرطي
ولا تبكيش وتعيطي
أنا مت يامه علشان بلدي
علشان بلدي تعيش
إبنك يامه مات شهيد
أنا إتولدت تاني من جديد
أنا مت يامه علشانك إنتي
وأنا وإنتي في الجنه نعيش
ماتبكيش
وإل مصبرني يامه وأنا في الجنه
مستنيكي
أطبطب عليكي وأبوس إديكي
وأتحني بتراب رجليكي
➖➖➖➖➖➖➖➖➖➖➖➖
