لما بشتاق لك
بقلم سامي محفوظ حنا
لما بشتاق لك بشوف
في القمر صورتك
ألوم عليك وأشكي منك
ولما أشوف الشمس
أحضن شعاعها
أحس بدفا حضنك
وفي لحظة الغروب
الشمس تودعني
قلبي جوايا يوجعني
كأني بودع حبك
ودموعي تنزل على خدي
من عيون بتشتاق لك
لما بشتاق لك
أسمع في تغريد العصافير
همس شفايفك
وفي جمال الورود
أشم عبير حسنك
بعيد عن عيني
لكن شايفك حسك ولمسك
ساكن بين ضلوعي
سامع دقات قلبك
مين يقدر يبعدني عنك
البعد مش مسافات
البعد لقلوب اتحجرت
والاحساس جواها مات
لا عاشت حاضر ولا ماضي
ولا كان ليها يوم ذكريات
ولا داقت طعم الشهد
في تنهيده كلها آهات
ولا حلاوة عذاب الحب
في القلب لما تحكيه العيون
رغم السكات
الحب ما يعرفش مسافات
ساكن قلبي وساكن قلبك
مين يقدر يبعدنا عنك
لما بشتاق لك
بقلم سامي محفوظ حنا
