دنيا يادنا
دير الخير ونساه
ف دنيا عجيبة
رجع ليه تلقاه
وخا قاسية وغريبة
مشات تقطع سناسل
جات تجي بسبيبة
غنم سوايع لهنا
وكون زين البسمة
عيش لوقات الزينة
را الدنيا ما دايمة
ماتنساش يا إنسان
المكتوب ما عليه هروب
المقدر لازم يبان
مهما تهتي فالدروب
سير مع ليام
نعم بكل ماهو مزيان
لاتحير فلهموم، صحا
تمتع بسوايع الفرحة
الدنيا تعطي وتاخد
لازم من الحيرة ولمتاعب
سير على قد حالك
صبر تنال لمراغب
ف دنيتك هايم غريب
وع لقضا غافل نايم
فرعون طغى وكان شديد
ونسى الخالق الدايم
الدنيا سفينة ف بحر عايمة
الراكب فيها غير عابر
السلعة معروضة قايمة
ف سوق فيه رابح وخاسر
موسى فلبحر ما غرق
كن مع الله وترجاه
رضيع ماذنب ما فسق
ربي رفع شانو ونجاه
فكر ف يوم تلقاه
واللقا معاه واجب
للرحمة والمغفرة سعاه
ترجاه لدعوتك يستاجب
حلم الدنيا زايل
غنم حياتك فالمصالح
لا تكون متعدي جاير
ربي يغفر وسامح
زجل عبدالله الخفيري
2024/06/20