حتة مشية
يا برنس وشيك ومعاك ماشية
عيني بارده عليك على دي المشية
روحي رايحه إليك ووراك ماشية
يا بني انت عليك حتة مشية
لايقه لمعاليك وعليك ماشية
مشية اميرات وسط الحاشية
مشيه بمعلمة واثقة وراسية
مشية حنية وشوق وغرام
مشية بتتهادى مع الأنغام
خطوة على طبلة ورق كمان
تسمعها الروح اجمل الحان
وتصحي السارح والنعسان
وتسيب الشوق ف قلوب خالية
مشية وعليها بقول يا سلام
مشية بتخطفني من الأيام
وتاخدني معاها على الاحلام
بسمعها تقول للقلب كلام
وتنادي عليا تعالى اوام
لليالي كتير ف العين حالية
مشيته بتزيد في نيران حبي
وتقول وتعيد لو فات جمبي
لأ مش ع الارض دي على قلبي
ومعاها بجد غلب غلبي
حد يقولها وانا ايه ذنبي
حد يبوحلها دبت ياغالية
بقلمي/ خالد جمال ٣٠/٦/٢٠٢٤
