بتقوللي حرَّانه
يا ريتني نسمة هوا
تسري ف عز الصيف
وتميل على عيونك
ولا تبقي زعلانه
يا ريتني حامي الحمى
فارس ف ايده السيف
ويموت فدا حصونك
ولا ثانيه يتوانى
يا ريتني كلمة رضا
تتقال تكون ع الكيف
تزول بيها شجونك
وتعيشي فرحانه
يا ريتني قطرة ندى
الوانها لون الطيف
سارحه على جبينك
م العشق هيمانه
اقدر اطول الفضا
اخطف نجوم الليل
وتلالي فوق كونك
ملكة وسلطانة
يا ريتني صوت ليه صدى
يسبق يشق الليل
وينادي مجنونك
م العشق آه يانا
أغطس لأبعد مدى
اجمع نفيس واصيل
واهديها لعيونك
دانا روحي عشقانة
يا ريتني فرش وغطا
حاسك وشايلك شيل
وعيون عليكي تميل
علشان تنامي الليل
وعيوني سهرانه
بتقوللي حرانه
بقلمي/ خالد جمال ٢٣/٦/٢٠٢٤
