بتقوللي دايبة
الحب عمره ما كان رذيلة
الحب ده اكبر فضيلة
بيدوس على النزوات ف قلبك
وبيعلى بيك بين يوم وليلة
ازاي تقولي ان انتي ملكي
ولا حاسة راحتك غير ف حضني
وفيه حد تاني شايلة اسمه
ده محال اخون او اقل مني
خنتي اللي صانك ليه وبعتي
وعشان ما امنك فيه خدعتي
ازاي هحس معاكي راحتي
وف حضني حاجه ومش بتاعتي
اللي انتي فيه ماسموش غرام
وخسارة فيه حتى الكلام
ده شيطان وواخدك للضياع
خلى الحلال زي الحرام
ليه تعيشي ويا الشوق رخيصة
وتكوني للاطماع فريسة
اعلي بحياتك م الحضيض
خليكي ع الاخلاص حريصة
شايفة السعادة ف ليل يعدي
وإن الخيانة دي حلم وردي
ماهو زي ماتعودتي تاخدي
بكره تبيعيني لحد بعدي
لو حتى روحي انا فيكي دايبة
لو عشت عمري ف ويل وغربة
ده الحب مش ليلة والسلام
سرقة شعور وكرامه غايبة
بتقوللي دايبة
بقلمي/ خالد جمال ١٢/٧/٢٠٢٤
