مصدوم
معقوله ده اللي وهبته قلبي
ما نسيت غرامه ف يوم
بقى هوه ده إللي اديته حبي
وكان قدر محتوم
ازاي قِدِر يخدعني كلي
وتشوف عنيه النوم
ازاي حياته بيعيشها بعدي
وضميره بقى معدوم
فكرته عزي كان حبه ذلي
كان شوق كمان مزعوم
كان حبه حالة كان حلم وردي
شق ف سمايا غيوم
كان اغلى شئ ف الدنيا عندي
ف بحور غرامه بعوم
مش هنسى يوم ما جه وقاللي
ده كل شئ مقسوم
بدللي حالي تاه عقلي مني
ما بين ذهول ووجوم
صحاني ليه م الحلم بدري
ارحملي اعيش موهوم
ندمان على اللي اديته ودي
بصرخ بصوت مكتوم
يعوض الله عليك يا قلبي
قدرك تعيش مكلوم
مصدوم
بقلمي/ خالد جمال ٢٩/٩/٢٠٢٤