نفسي اسعدِك
نفسي اجيبلِك
كل حاجه بتعجبك
نفسي عمري وضي عيني
ليكي وحدك اوهبك
نفسي اعمل م النجوم
عقد ليكي يضوي بيكي يفرحك
نفسي اكونلك دعوة شافية
لو بعدتي عن عيوني تقربك
ابقى ليكي ضحكة صافية
لو زعلتي وحد فيهم عصَّبِك
قلبي يبقى دراع وعافية
يمحي فيكي كل حاجه بتتعبك
الغي خوفك ابقى سيفك
ماتلاقيش ف الكون ده حاجه بترهبك
لو بردتي
تلقي فيا فَرٌشه دافية
تبقى روحي هيه شالك معطفك
وان شكيتي
من حرارة عليكي جافية
ابقى نسمة تسري حدك تنصفك
ابقى ليكي فرحة كافية
من هموم الدنيا تاخدك تخطفك
تبقي ليّا نور عنيا
كل فرح الدنيا ديه
ابقى حاجه تشرفك
م الليلادي وم الساعادي
اتولدتي ف روح فؤادي
وانتي برضه تاريخ ميلادي
نن عيني بيوعدك
نفسي اسعدك
بقلمي/ خالد جمال ٢/٩/٢٠٢٤