بدون أسباب ؟!!!!!
بتهجرني بحجة إن قربي عذاب
وعهدك بالامل كداب؟!!
وإن الشعرا مشاعرهم ساعات حاضرة
ومعظم وقتها في غياب؟!!
وإن الزهد من شيم الفؤاد
لما يلاقي نبض حبه داب؟!!
وإنك مش أكيد ضامن مع حبي
أمان العمر وهناوته فقلت:
تجيب من الآخر وتقفل عالرواية الباب!!
وترمى في الفضا المفتاح
ولو مرة رماك الشوق على بري
هتحلف لي غرامك شاب!!
بتنكر عهد أشواقنا اللي وثقته
في ساعة صفو بعيونك
ونظرات الشغف والميل
بتفتح بيننا كشف حساب!!
وترفض في الوساطه ليه
وعود روحك وأحلام الهنا
لما مليت بحروفها ألف كتاب!
وتتجنب ليالي الوصل بصدودك
وتكتم جوه روح قلبك
آهات البعد وأنينه
ولا تسمح لدمعة عشق هربانه
ما بين صمتك تستف لك ملام وعتاب!
وتتحجج ب100حالة
و100منطق ما هووش مقبول
عشان أرضخ وأستسلم
وأبطل أسألك تااااني:
يا سابح عشق في كياني
وغارس شوق في وجداني
عابزني إزاي أعديها وأسيبك
فجأة تهجرني .بدون أسباب؟!!
بقلمي عبيرالصلاحي
من ديواني تعال أما اقولك
