ارجع يا حبيبي
ارجع يا حبيبي رايح على فين
دانا دبت حِنية
بتقوللي هاغيب بس دقيقتين
والله ولا ثانية
او اعِد لحد ما اقول عشرين
على عيني يا عنيا
إن غبت ثواني يا ضي العين
ما بعيشي ف الدنيا
دانا ببقى ف غربة تملي حزين
والفرحه مطوية
دي دقيقة ف بعدك تسوى سنين
والثانية دي بمية
دانت بتوحشني ف غمضة عين
لو غمضتها شوية
ده منايا حبيبي تبات ف العين
تبقى النظر ليا
وليلاتي انام على صورة الزين
منقوشة ف عنيا
إن غبت حياتي عايشها انين
ودموعي سيل ميه
مِلك لأحزاني لجرحي اسير
والآه نار فيا
وظنوني بعقلي تودي تجيب
والراحه منسية
وماليش ف البعد غير التنهيد
جمر وقايد فيا
وتقوللي هاغيب بس دقيقتين
وكأنها شوية
خد قلبي معاك لو رحت لفين
خد روحي وعنيا
بقلمي/ خالد جمال ٢١/١٠/٢٠٢٤
