هي ليه القهوة سادة
عامية
لمحمودمطر
سألت صاحبي أنت ليه
بتشرب كل يوم القهوة سادة
وليه ما تشربها محوجة وعليهاسكر
وحبةقرنفل والحبهان حطه زيادة
ضحك صاحبي وقال لي هو إيه حواليه حلو حتى تكون قهوتي سكر زيادة
هو المرار اللي أنت شايفة مخليني شايف حواليه يا راجل أي حاجة
أنا بختصر يا عم طريقي وبشرب مراري في فنجان القهوه ساده
وام العيال عندي في بيتي معكنناني وعايزةكمان مصاريفهاحتى للولادة
اسكت أرجوك وبعد
وما تسألني هي ليه القهوة سادة
دا المرار عندي طافح حتى نايم جنبي و بيشاركني الوسادة
يا عم روح أنت فايق ورايق دا أنا عندي ديون وكل يوم صارت زيادة
قلت له يا عم خفف هو مولاك بينسى وكرمه زايد وكله جايلك في الزيادة
قال لي ياعم اسكت دا الحالة ضنك حتى الولد خايف أهوب بيه ناحية الدكتور أو أروح نحو العياده
والطبيب لما يقولي حلل والأنيميا عند ابنك هي ليه صارت زياده
سبني ياعم بمراري وبكلامك متزودش همي على همي زيادة
والفطار الصبح بلوة حتى إني صمت وبقت قهوتي الصبح كل يوم دي عندي عادة
تصور انا على لحم بطني ياعم خليك في حالك وما تخلي همي من جوعي زيادة
اوعك تقولي اشرب قهوتك أبدا زيادة
سبني دا المرار كان عندي طافح وبتلومني هي ليه القهوة ساده
دا الولية كل يوم قاعدة تولول وطلبتها كل يوم صارت زيادة
والولاد حتى في المدارس والدروس أصبحت عند ولادنا شبه عادة
والمناشير شغالين الحصة بخمسة مية وكل يوم حصصهم في زيادة
الله يرحم زماني كان المدرس يجيلي يديني حصة ببلاش ويقعد يفهمني زيادة
وكنت لما الدكتور أروح ويحس حالتي يمد ايده ويديني الدوا من عنده زياده
ويرفض كمان حتى ياخد مني كشفه ولما أرجع يطمني زيادة
اسكت ياعم وبعد أنت عني واوعك تقولي هي ليه القهوة سادة
دا عندي المر طافح لما أروح لعم حكشة بتاع الفول ويخرج المغرفة وما هي شايلة حاجة
وزمان كنت أروح لأبوه حكشة الكبير الله يبشبش الطوبه اللي تحت راسه
يملا لي طبقي فول ويحط زيت ولمون ويديني عيش وبصله والخضرة دي كانت زيادة
وكل دا كان بقرش صاغ آكل وأملى بطني ونشاطي يبقى في شغلي في زيادة
وأروح شغلي انفد في الحديد ماهو الفول سندني وخلا طاقتي في زيادة
ياعم روح وابعد وسبني كمان في همي واوعى تقولي هي ليه القهوة سادة
أصل المرار عندي طافح والكآبة صارت زيادة
قل لي ايه في الدنيا حلو لما عايزني أشرب قهوتي سكر زيادة