الاحساس نعمة
يابني الاحساس قالوا عنه زمان
فضل ونعمة
واللي ما بيشوفشي من الغربال
ده اكيد اعمى
والذوق مش عيب ولاضعف كمان
او ليك وصمة
ولا طولة البال تتسمَّى هوان
ف الروح قاسمة
دي الكلمة بتمحي كتير احزان
وتزيح ازمة
وإن تقلت ما تنطقت بلسان
تكفي البسمة
وسكوتك بدل القول بهتان
اعلى واسمى
خليك ف الصهد هوا الحرّان
زي النسمة
شيل شالك حُطّه على البردان
ده مناه يدفى
وإن عينك وقعت على تعبان
ساعده ف لحظة
واللي بيشتكي صد وحرمان
ادّيه وردة
ده اللي بيدِّي دايماً كسبان
روحه بترضى
واللي بيدّارى خسيس وجبان
فيه الروح شاردة
احساسنا ببعض ف كل أوان
اكبر نعمة
واجمل صفة زاينه بني الانسان
هيه الرحمة
بقلمي/ خالد جمال ٢٧/١٠/٢٠٢٤
