أحلام الفتى الطائش
لمحمودمطر
أنا نفسي أركب عربية موستنج ويكون لونها حتى أحمره
والبس بدله فانكي ويكون لونها مسخسخ أو حتى أخضره
أصلي شاب جميل وغاوي أعمل فشخره
وآخد الموستنج ألف بيها كل حته أصلي غاوي منظره
وأركنها قدام الكافيه وأسمع عليها ثرثره
ويقولوا دي بتاعت ابن باشا أو راجل كوبره
وانا قاعد سامعهم وفي إيدي سيجار أصلي غاوي فشخره
ولما يجي الجارسون يسألني ايه هتشرب أقوله فخفخينا بس متكونش مسكره
وكمان نفسي أروح آكل سيمون فيميه اللي أنا مش عارفه ولا حتى أعرف منظره
ونفسي أتجوز بت مزه لما تمشي جنبي يقولوا دي مزه ولا حتت سكره
وتقولي أصل بابي جابلي فيلا كبيرة بس قلت برضه صغيره
وتقولي تعالى نصيف في جنوب شرق أسيا ونروح لما نرجع أنقره
أصلي شاب جميل ونوزهي وغاوي فشخره
وبحلم يكون عندي عزبةفيها خفير نظامي وكارته بحصاني مجرجره
ولما أروح يقولوا الباشا جه وانا أبص ليهم من تحت المنظره
أصلي شاب جميل ونوزهي وبحب الفشخره
كل دا وأنا قاعد أحلم لما أخويا رفسني برجله وقالي أصح مناخيرك
عمله إزعاج وعمله زعبره
صحيت ولقيت قدامي عوكل ابن خالتي قاعد وشه مغبر محتاج له سنفره
أصل صاحب الشغل طرده وقاله
من بكره الشغله مسكره
وأخويا قاعد بيضحك أصله سمع كلامي في حلمي اللي كان آخر مسخره
وقال يا عم احلم وبلاش حلم يكون كبير واحلم بفرخة محمره
أو بربع جبنه رومي ورغيفين شامي دا حتى بطني مقرقره
أو حتى بيضه بلدي الفرخة بيها مبشره
ومن بعدها عرفت إن الحلم ضروري
يكون على قدي وأبطل فشخره
اما الأحلام الكبيره فدي ليها ناسها
أما حتى احلامنا ضروري تبقى صغيره
ومن بعدها قررت ألف لحافي حول وسطي لأني لما بتعرى أحلامي بتكبر بتبقى مسخره
محمودمطر