ليه تيجي عليك؟!
راجع هتعيد نفس الغلطة
تظلمني وترميني ف ورطة
ولقلبي تجيب ف هواك جلطة
راجع بعد ماخربت مالطة
بزيادة معاك شغل اونطة
احسنلك يابني بعيد خليك
ليه تيجي عليك
راجع بعد ما دمعي اتحجر
من كتر البكا جفني اتخدر
مانا قلبي معاك كان قلب اخضر
بس انت هواك عمره ما قدَّر
وطعني ف ضهري بميت خنجر
بعد ما كان قلبي مآمن ليك
راجع بعد امَّا الروح تعبت
لما من الأسى والويل شربت
ماهي لاجل هواك م الخوف هربت
وعشان عاشقاك ف الكون حاربت
ماهي كت فاكراك ليها المُنجد
وزرعت الخوف جواها بايديك
دوّر على غيري عشان تغويه
علشان من سم الشوق ترويه
مانا قلبي خلاص مابقاش ليك فيه
انسى ان دراعه ف يوم تلويه
لا هيرجع تاني يعيش ف ماضيه
ولا يوم هيحن لقلب نسيه
لو شاف الدمع بحور ف عنيك
ليه تيجي عليك؟!
بقلمي/ خالد جمال ٧/١١/٢٠٢٤
