الميمة
الله الله راني تفكرت الميمة
مشات بگري والسالف كحل غراب
مشات الميمة الحكيمة
وخلات وراها شلى عذاب
وبالگرام تخرج الكليمة
الله يرحمها ما فيها ما يتعاب
الى فرحت تبان التبسيمة
والى تقلقت تقلق بلا لوم او عتاب
كانت هي عمارة الخيمة
مشات وبقى. وراها الخراب
كلشي كانت فيه فهيمة
من حداكة وتاويل وصواب
كونت نظن غادية تبقاي جنبي ديما
وما كنت لفراقك عاملة حساب
في غيابك وانت وبويا النفس سقيمة
من نهار ردمكم التراب
الدار بلا بكم ما عندها قيمة
وللي گال غير هاذ الكلام كذاب
كنتو السر والملح للطعيمة
وكنتو جامعين الخوت والأحباب
كلمة امي بويا كانت تخليني زعيمة
وفي غيابهم الجهد غاب
نجات بوريشة