خيال شارد
بنحب كتير وبنتواعد
ونقرب واحنا بنتباعد
والعين لو تهوى حبيب واتنين
القلب ما يعشق غير واحد
بنطير بجناح ع الشوق فارد
وكتير بنعيش بخيال شارد
ونعوم ف بحور أشواق وحنين
والمرسى ف شط حبيب واحد
بنعاند روحنا وبنعافر
وزمانا عليه بنقول كافر
بإيدينا بنهجر ناس غاليين
وبنبعد عنهم ونسافر
بنعيش ف العمر متين حالة
على قلب عشقنا بنتعالى
والعمر يعدي ف غمضة عين
وقلوبنا تعيش فيه رحالة
بنقول ع العشرة أنها هانت
والروح ملت منها وعانت
وبنعرف بعد عذاب وأنين
ياما ضحت لينا وياما صانت
نتسبب ف جراحنا وعادي
وبنضحك على روحنا بماضي
معقول ده كلام يفهمه عاقلين
ده أكيد أوهام وكلام فاضي
ليه تملي نكابر ونآوح
ليه كلامنا كمان آسي وجارح
ومادام ع الحب يا ناس باقيين
مانعيش وقلوبنا بتتسامح
بقلمي/ خالد جمال ٣٠/٥/٢٠٢٥
