خلّاف وعود
صياد قلوب وقلبه صادني
والعشق مني اتمكن
بجمال عنيه خد عقلي مني
بقوامه ده اللي يجنن
لو احن لِيه ألاقيه يلاوعني
ويقوللي يا بني يحنن
ولا عمر قلبه رق وطاوعني
وتملي فيا يعكنن
وانده عليه ولا يوم سمعني
ولا حتى كلمة تطمن
دانا قلبي شاري طب ليه يبيعني
يوعد وقلبه يصهيّن
لو قال معادنا ع العصر يعني
بكون هناك
قبل الآدان مايأدن
واستنى طيفه ع الروح يعدي
وكأني ليه بتوسِّل
واقلق عليه ويسيبني وعيي
وظنوني فيا تنسّل
وأسأل عليه ماجيتشي ليه
يقوللي كنت مكسل!!
زود كلام عزالي عني
ف هواه ظلمني
والكل بقى بيلسِّن
كترت آلامي واتمكنت
جراحي مني
ولا يوم كمان بتحسّن
وبقوله حنّ
م الشوق بأنّ
ألاقيه يضِنّ
ولا جرحي مرة يسكِّن
أيام تمر وسنين تفوت
والعمر مر عدى ف وعود
هوه عشان ما بحبه موت
لازم يشوفني بعنيه بموت
ويحن لما أبقى ف تابوت
ويجيني وأنا متكفن
وف يوم مماتي يتمنى اعود
خلّاف وعود
بقلمي، / خالد جمال ١١/٦/٢٠٢٥
