ماضي وراح
مهما تقول وتعيد وتزيدلي
مهما هتبكي وتتنهدلي
لو ف ايديك شمعات هتئيدلي
لو ف عنيك نور شمسي وبدري
عدى الوقت عليك من بدري
أيوه زمانك ولى وراح
كنت بصون حبك ف عنيا
كان قلبك غالي ياما عليا
وانت بتجني وتخدع فيا
وأنت ليلاتي بتلعب بيا
كنت واخدني معاك تسلية
جاي دلوقتي تقوللي سماح
ياما قلتلي عشقك ده هدية
وإن الشوق وردة مندية
قبلي حياتك كت منسية
ولا عمرك هتعيش بعديا
عيشتني أحلام وردية
وأنت بتزرع فيا جراح
لو حرّان محتاج تهوية
كنت أنا ليك نسمه معدية
لو ف الشتا حسيت بأذية
قلبي الغطا ليك والتدفية
على كتفك شال ويا كوفية
كنت أنا ليك كل الافراح
بعد ما خنت الروح بتقوللي
اتعلمت أنا م اللي حصلي
أيوه ندمت وندمي كسرني
بس هواك مابقاش يلزمني
اللي أهاني ورخص تمني
سابني مع الأحزان سواح
ماضي وراح
بقلمي/ خالد جمال ١٥/٦/٢٠٢٥
