امسامحك على طول ياستي بقلم
شاعر العروبة عبدالله العمراني
ليش غييبتي ولية تركتي
وانقطعت أخبارك عني
معاد متهني
و قلبي ذايب زايد همي
ليش تعاقب فية ليش
وانا ابحبك ملتاع ومريض
من يوم شفتك عشقي يفيض
مزروع في قلبي وغليض
درولني و ماعاد انريض
من داك قاتلني اترضريض
والشوق بغيض
جمرك في الكويان نهيض
ليش يا محبوب
معادش راغب فية ابنوب
وانت من الصغرة منسوب
لية مكتوب
ولأنفاسي وخاطري مرغوب
وهواك الزولي مطلوب
لك نهوى وعليك مانتوب
ليش اتحادفني بالطوب
وانا من نار عشقك انذوب
وانت لي ألذ مشروب
ليش ماتحرمني واتكلمني
وتسَمع مني واتجاوبني
ولو ابكلمة الطمني
وماتحقرني
أنا حسبتك غالي اتساعدني
وماتطحني
الدوس على كرامتي وتنحرني
اتزيد تحرقني
والتوهني وتتجاهل حبي وتطعني
ماكنت نتوقع ترخصني
وتشمت في حالي وتنكسني
انموت ابعلتي وما تسعفني
أخيت ع الحب هوا اللي جلبني
وغر بية بزولك طمعني
وخدودك عمتني
بنورها البازغ بيه غوتني
ولون اعيونك زاد سحرني
لجنابك ساقني وكتفني
مهما من اللعناد بلغتي
وعني وعن قلبي كبرتي
ما يوجعني ولا يأثر فية ويدفعني
نترك زولك مهما فعلتي
مانملك غيرك شاغلني
اللا انت اتقودي مملكتي
مهما للمكروه جنحتي
امسامحك نشهد عني اركبتي
ولهالكي اقربتي ووصلتي
كيف مارغبتي
عرفتي فيك حلمي ومصلحتي
مهما رفعتي
في سومك بيه قابل كيف ماهندستي
كيدي وكدتي
عليك ما نرجع في اموافقتي
