إبن أمي
بقلم سامي محفوظ حنا
ايه يعني لما
أبقى إبن أمي
هو أنا ليا وجود
من غير وجود أمي
تسع شهور حملتني
اتغذى من دمها
بيني وبينها حبل سري
بالألم والتعب ولدتني
في مخافة ربنا ربتني
واجب عليا طاعتها
مين يقدر يعصاها
ويخسر رضاها
أنا عايش ببركة دعاها
في صبحها ومساها
إبن أمي مش ناكر
عمري ما أكون
لفضلها ناكر
لو أمرت أقول حاضر
في أي وقت تطلبني
أكون عند رجليها حاضر
من صغري لحد ما كبرت
شايلاني في قلبها
وفي فكرها حاضر
مين يحب ليا
الخير قد أمي
وتفرح لما تشوفني
سعيد متهني
عمري ما يبقى
لي خير في حد
لو ما ليش خير في أمي
مين قال إبن أمه
ما يبقاش راجل
دي علمتني من صغري
أكون راجل
مش كل اللي انكتب
في شهادة الميلاد راجل
يبقى راجل
ياما فيه أمهات
ب 100 راجل
ومنهم أمي
اللي ما تعلمش من أمه
يفضل طول عمره أمي
هي حياتي ويرخص لها عمري
إبن أمي
بقلم سامي محفوظ حنا
