حلقةاليوم
الصحبة والوشوش الكدابة
مساء الناس اللي اتوجعت من أقرب الناس
مساء اللي ادو الأمان لقلوب ما تستاهلش
حلقة النهارده
عن الصحبة
عن الوجوه اللي تضحكلك
وفي غيابك تبيعك
عن ناس كانت تقول إحنا ضهرك
ولما وقعت
ما لقيتش غير نفسك
دي حكاية ناس كتيراتعلمت متأخر
إن مش كل صاحب
يبقى صاحب
صاحبت ناس كتير وقالوا إخوات
وفي الشدة اختفوا وسط السكات
باعوا العيش والملح في لحظات
وسابوني أواجه وحدي الحكايات
كنت فاكر إن الصحبة سند وضهر
طلع الزمان بيكشف معدن البشر
واللي حلف يفضل معاك للعمر
أول ما تتعب يغيب مع السفر
في ناس وشوشها ضحكة وسلام
لكن قلوبها مليانة خصام
يقربوا وقت المصلحة والكلام
ويختفوا أول ما ييجي الظلام
ويا ما قولت ده صاحبي وعشرة عمر
وأسراري عنده محفوظة في الصدر
طلع بيحكي حكايتي لكل البشر
وكإن الود كان تمثيل وغدر
يا صاحبي كان نفسي ألاقي أمان
وسط زمن بقى كله دخان
كل واحد لابس ألف لون
والقلب الطيب عايش حيران
بقينا نخاف نحكي اللي جوانا
من كتر ما الغدر هد حيطانا
الناس بقت تحفظ مصلحتها
ولو تتعب تبيعك في ثواني
الجدع بقى عملة نادرة اليومين
والصاحب وقت الضيق بقى فين
كله بيجري على نفسه وخلاص
وسايب جراح الناس
لكن لسه الخير موجود
ولسه في ناس قلبها موعود
يعرفوا قيمة الصحبة بجد
ويصونوا العيش والملح والعهود
الصحبة مش صورة ولا كلام
ولا قعدة ضحك وسط الزحام
الصحبة موقف وقت الآلام
وقت السقوط ووقت الخصام
الصحبة إنك تلاقي حد
واقف معاك وقت الجد
لا خان ولا يوم استغل
ولا باعك في يوم لحد
الكلام ده من القلب قلب شاعر البسطاء
أوعى تدي سرك لكل الناس
مش كل اللي يضحكلك أمين
دا في فرق كبير
بين صاحب وقت الضحك
وصاحب وقت الكسير
اللي يقف جنبك وإنت مكسور
هو ده الحقيقي
وغيره مجرد وقت وعدى
يا صاحبي خليك على طبيعتك
والأصل دايمًا هو قيمتك
لو خانك ألف شخص يوم
ما تخسرش أبدًا طيبتك
في ناس ماتتعوض بألف كنز
وناس وجودها كله أذى وهمز
اختار اللي يصون غيابك
ويخاف على قلبك والرمز
العشرة الحلوة مالهاش تمن
والقلب الصافي يعيش في أمن
واللي يبيع صاحبه يوم
عمره ما يعرف معنى السكن
دي كانت حكاية النهارده
عن الصحبة
وعن الوجوه اللي الزمن كشفها
مش كل قريب منك مخلص
ومش كل بعيد عدو
اختار اللي يشيلك وقت تعبك
مش وقت فرحتك بس
الجدع وقت الشدة يبان
مش بالكلام ولا العنوان
واللي يصون عشرة عمر
ده اللي يستاهل الأمان
خليك وفي مهما الزمان
غيّر وشوش وعنوان
ده الأصل يعيش في القلوب
ولو غاب سنين وسنين
كلام من قلب الحياة
كلمات وتأليف شاعرالبسطاء سعيدسعيدامام #شاعرالبسطاء #سعيدسعيدأمام
#الجميع #اشارة
