كشف
حساب
للبلياتشو !؟
إبني حبيبي ضي عينيا
إنت النبض الساكن فيا
إنت ليالي العمر الجاية
بعد الشوق
من قلب باباك
بدعيلك . بترجاك
تنسى قسوة بُعد لُقايا
تنسى إنى يوم أنساك
إنت واخوك واختك يا بني
أغلى ما عندي . بس الدنيا
مش عايزاني أعيش وياك
إعرف يا بني
إن الدنيا بحر هلاك
ديماً عينها ب تتمناك
وانت بطيبة قلبك ليها
بتصدقها وتغنيها
كل أغاني العمر هناك
إعرف يا بني
إن الدنيا لوحة كبيرة
لازم ترسم روحك فيها
جايز تقدر تلغي هواك !!
إرسم يا بني مدينة جميلة
إرسم نور. إرسم طير
إرسم أرض ماليها الخير
إعرف إنى راسم قبلك
وردة شبهك. كانت دايماً
تتحداني وتستناك
إياك يا بني تصدق غيري
غيري يا بني عُمره ماحبك
وان كان قلبك قالك إن باباك
كان ظالمك . صدق قلبك
وانا عن نفسي أكيد
راح اسامحك واستناك
إعرف يا بني إن العالم
كله فداك . وان الدنيا
لما تعوزك. لازم تبقى
مواربة الباب. غلطة عمري
إني دخلت بدون أسباب
لما نسيت أتعلم منها
جدول ضرب
وكشف حساب
عارف يا بني أنا من غيركم
عامل إيه ألف وألف
و ألف عذااااااااب!!!!
/من ديواني
أحضان مغرمة/
شعر
للبلياتشو
وليد حسانين
2/10/2015
القاهرة/مصر
وليد عوض إبراهيم حسانين/@
