زجلية بعنوان:
جيب الربحة ***
ربط
ذاك لفروج لَمْزَركًط
راه كُلو تْشلهيب
شْحال هذي دارْ لْعيب
رْشى وَزًور وعَرْبط
ليوم يا لأسود جاتْ لْفُرصة
ب لعقل والروح تزيدوه غصة
فنان لمستديرة...
ديما مغرب فنظم وخطط
سْبوعة قادين وَقْدود
مشاو بعيد وحطموا لقيود
ول حْكَر وَهان ...
غدا يذوق لْمُر ويزعرِط
بينا وفروج فرنسا حْساب
باع وشرى وتوعد وعاب
دار بركوكش وعوانو...
وعلى الذبرة حك حيتْ مْفَرْيَط
زعيم راشي باغي الربحة
ولف عوايد الدوح والفار جلاخة
وبكل الطرق ...
ريحتو عطات ووزنو تشنشط
خمسة وخميس وتسالي ذيك اللعبة
يرجع لفروج مهزوم شدًاه القَجة
يطير ول فرط ضروري يكرط
وا عْفَط
راه ذاك لفروج جايكم مكلوم
بَ تْخربيقو ظن راسو من النجوم
طالع بالسنطيحة ...
مخلوق بَلَخواض محنط
يا الله وريني ومتعني
من لفرحة لا تحرمني وزدني
رْزانة وثْبات ...
راه غلتهم خرْفَت وكرموسهم عنطط
من واحد حتى لَحْداعِش
حيط قوي ساد على لخفافش
عطيهم الدرس ....
فمغرب اليوم خُرْ وللقدام خطط
ربط
ذيك العجرفة والهزان
ذوك لفرارج وعلقهم نيشان
طاكي واجه صبر ماركي بَلًق وخَيًط
بل سد دلقوش المنافقين
اعداء لبلاد تريكة دْيال لملاعين
جيب الربحة ....
ولفروج نرفسو به
وخا يعيا ما يصيح ويتخبط
فجيب الربحة
رد الصرف للفروج وخْرط
***الشاعر والزجال:أحمد الكندودي ***المغرب
