الرزق مش فلوس
بقلم الكاتب الصحفي وشاعر البسطاء
سعيد سعيد امام
الرزق مش كوم فلوس في الجيوب
ولا بيت كبير ولا بابه حديد
الرزق ضحكة أم تدعيلك بخير
تفتح في وشك ألف باب جديد
الرزق أب شايل هم عياله
يبات جعان ويقول أنا سعيد
الرزق صاحب وقت الشدايد
يبيع عمره ولا يبيع الوعيد
الرزق طفل ينام وهو ضاحك
ولا يعرف من الدنيا تهديد
الرزق صحة تقوم بيها الصبح
ولا تشكي وجع ولا تنهيد
الرزق قلب لسه بيعرف يحب
ولا فيه غل ولا حقد يزيد
كم واحد عايش وسط ملايين
وقلبه من الوحدة مستوحش بعيد
وكم واحد في أوضة على قده
لكن ضحكته تساوي ألف عيد
الرزق زوجه تقول لجوزها
هون يا راجل وربك أكيد
والرزق زوج يشيل عن بيته
ولا يعرف غير الستر رصيد
الرزق ابن يرفع راس أبوه
ويبقى بين الناس اسمه سعيد
الرزق بنت تبقى سند لأهلها
وتخلي البيت كله عيد
الرزق جار يسأل عليك
قبل ما تمد له الإيد
الرزق كلمة تطلع من قلب
تقوم واحد كان خلاص وحيد
إوعى تعد رزقك بالفلوس
في ناس أغنيا وعيشتهم كدر شديد
عده براحة بالك ورضاك
وبقلبك لو كان لله مريد
أصل القناعة تاج الغلابة
والشكر يزود رزق العبيد
واللي يشوف نعمة غيره بعينه
عمره ما يعرف طعم المزيد
بص للي تحتك واحمد ربك
تعيش غني حتى لو إيدك قليلة
يمكن فقير في المال والدنيا
لكن عند ربك عالي القيمة
ولما العمر يقفل كتابه
وتخلص حكاية كل وليد
لا هيتسأل كام كان في جيبك
لكن هيتسأل كام قلب أسعدت بإيدك
وده الرزق اللي يعيش بعدك
لا بيتسرق ولا يوم يكون بعيد
بقلم الكاتب الصحفي وشاعر البسطاء
سعيد سعيد امام
