لصوص العمر
بقلم الكاتب الصحفي وشاعر البسطاء سعيدسعيدامام
قالوا الحرامي يسرق مال ويكسر باب ويجري فرار ويستخبى بين الجدار ويخاف من أول نهار
وأنا شفت حرامي أخطر كتار يسرق ضحكة ويقتل نار ويهدم حلم ويكسر دار ويضحك وسط الانتصار
لا عمره لبس قناع ولا يوم دخل عراك ولا شال سلاح ولا كان ليه أي شعار
لكنه يسرق وقت الغلبان ويبيع له وهم بالألوان ويقوله اصبر لسه الأوان ويعدي العمر في الانتظار
وييجي لواحد قلبه شجاع يزرع فيه خوف وارتجاع ويقوله متحلمش بالنجاح ده الرزق مكتوب للكبار
وييجي لطفل عينه بريئة يحط قدامه ألف مراية ويخليه يجري ورا الحكاية وينسى كتابه والمشوار
وييجي لشاب مليان همة يسرق منه أول قومة ويقوله الدنيا دي زحمة قوم نام وسيبها للتيار
وييجي لأب شقيان من صغره شايل هم البيت فوق ضهره ويخليه يحاسب نفسه بعمره ويقول يا خسارة على المشوار
وييجي لأم قلبها حنين عايشة لولادها سنين وسنين ويخلي كل واحد فيهم سجين شاشة وسجين أسوار
ده حرامي ملوش عنوان ولا ليه شكل ولا ليه مكان لكنه يدخل كل بيت من غير سلام ومن غير استئذان
مرة يدخل من باب الكسل ومرة يدخل باسم الأمل ومرة يقولك بكره أجمل ويضيع النهار بعد النهار
ومرة يقولك شوف فلان سبقك بماله وبالبنيان وتفضل تبص لغيرك كمان وتنسى نصيبك والمقدار
ومرة يزين لك ألف طريق كله سراب وكله بريق ويخليك تجري من غير فريق لحد التعب والانهيار
ده مش بيسرق جيب ولا مال ده بيسرق عزيمة ورجال بيسرق ضمير وصدق مقال ويبيع الوهم في كل دار
نصيحة من شاعر البسطاء سعيدسعيدامام
احرس دقيقة قبل الساعة واحرس الساعة قبل النهار واحرس نهارك من الضياع قبل ما يبقى مجرد آثار
ما تفتحش بابك لكل كلام ولا تصدق كل إعلان ولا تجري ورا كل ألوان يمكن تكون أول خسار
وازرع في قلبك نية خير وخلي رضاك أكبر ذخيرة واعرف إن العمر لو طار لا يرجع بمال ولا دينار
ولو سألوك مين أخطر لص قول اللي يسرق حلم الصغير واللي يبيع للناس ضمير واللي يخلي اليأس اختيار
ولو سألوك إيه أغلى كنز قول قلب نظيف وعقل منور ووقت مصان واسم معطر وسيرة تعيش بعد المشوار
بقلم الكاتب الصحفي وشاعر البسطاء سعيدسعيدامام
