الليل ف عزبة جدي .. !!
الليل ..
ف "عزبة جدي "
زمااااااان
كان يسهر معانا
لوش الفجر
ويبات .. فرحان
يمشي ع كيفه
ف شوارع العزبة
يغنى لنا مواويله
ينشر على الدنيا ..
جماله .. وطيفه
ويسهر هيمان
لحد الفجر ...
ما نوره يبان
يلعب معانا ..
" استغماية "
وكان يتحزم ..
ب " لواية "
يجري يستخبى ..
ف درواية
تحت " نواية "
ف ضي القمراية
ويلف شوارع العزبة
يسقينا الشهد ..
ياسمين وريحان
بنسيم صيفه
ويعبي لنا الدور ..
أفرااااح
وليالى ملاح
أشكال .. والوان
وقبل الفجر
يوزع ع بيوتنا ..
" شيلان " الفرحة
و 100 *طرحة"
ويبات ف أمان
ف جرن العيلة
من غير هليلة
لحد ما يظهر ..
قرص الشمس
ويعلا فوق الجدران
يصحى .. ونلبس ..
جلاليب السعد
ويروح داره فرحان
الليل ....
لما يشوف "جدى " ..
كان يجري عليه ...
ويبوس ف ايديه
ويلم حواليه الجدعان
يقعد جدي ف "مندرته"
والليل حواليه سهران
يضحك له ..
ويبوسه ف " قورته "
ويعزف له ع الكمان
أجمل ألحااااان
الليل .. أصلا ....
كان صاحب جدي
كان يمشى معاه
ويدوب ف هواه
ويجري وراه ..
ف شوارع العزبة
وجدي يطبطب ع ضهره
ويعطر خده ..
بفله .. وورده
ويزرع قلبه أمان
يفرح ويدعي لجدي
دعاوي تملا ...
حوالي سبعين فدان
بركة .. وإحسان
الليل ف عزبة جدي ..
كان بيحرس ...
أجران الأمح النعسانة
اللي عمالة بتحلم ..
زي عريس وعروسة
ف كام بوسة ...
قاعدة مشتاقة " للنورج "
يصحى ..
وياخدها ف أحضانه
لجل ما تملا مخازن الدور
بركة .. ونور ..
ورزق من الرحمن
وتحقق حلم الجوعان
بحوانين محشية ..
حمام ... وحنان
ولا ينسى الليل ..
إنه يشقر ...
ع الساقية الدايرة
ف حضن التوتة
يهدي لها ...
غنوة و" حدوتة "
و " الناف " الدفيان
عمال يرقص ..
ع ضهر تيران
دايرة... وفرحانة ..
ف مدار سهران
يروي أرض العزبة
شهد .. مصفي
زي " الدبلان "
من نهر النيل الولهان
وهو عمال يتغزل ..
ف "مساقي " الأرض ..
العطشانة
حنين ... وحنان
ف حضن القمر السهران
الليل ف عزبة جدي
كان مصاحب ...
كل الجدعان
ويدعي لجدي ..
ليل ..... ونهار
دعاوي حلوة جميلة
إنه يعيش ف سلام وأمان
ويحفظه الرحمان
الشاعر / منصور أبوقورة