علاج الروح
بقلم الكاتب وشاعر البسطاء سعيدسعيدامام
لما الروح تتعب
مش دايما الدوا بينفع
ولا حضن الناس يكفي
ولا الكلام يداوي الوجع
ساعات بنحتاج لحظة
نقعد فيها مع نفسنا
نقفل باب الدنيا شوية
ونسمع صوتنا جوانا
اصلنا تعبنا نجامل
ونقول احنا بخير
واحنا من جوا بننزف
ونضحك عشان ما نثيرش
تعبنا نقول معلش
لكل اللي كسر خاطر
ونشيل فوق كتافنا
وجع مش وجعنا ونقول حاضر
تعبنا ندي من روحنا
لناس ما تعرفش قيمتنا
ونرجع اخر اليوم
نسال هو فين حقنا
علاج الروح مش فلوس
ولا كلمة من انسان
علاجها قلب يسامح
بس من غير ما ينسى الاحزان
علاجها انك تفهم
ان اللي راح مش نهاية
وان اللي وجعك امبارح
ممكن يكون بداية
علاجها تبعد شوية
عن كل قلب مستنزف
وتعرف ان الهدوء
مش ضعف ولا خوف
علاجها تبطل تجري
ورا ناس مش عايزاك
وتدي لنفسك فرصة
تحبها زي ما رباك
علاجها لما تقع
ما تجلدش روحك كتير
قوم وامسح دمعتك
وقول لسه في العمر خير
علاجها كلمة حلوة
تقولها لنفسك بالليل
انا لسه اقدر اكمل
ولو الطريق كان تقيل
وعلاجها لما تحس
ان الحياة ضاقت عليك
تفتكر ان ربنا
لسه مخبي الخير ليك
ساعتها الروح تهدى
والجرح ينام في امان
وتعرف ان الشفا مش
ان الوجع يختفي كمان
الشفا انك تعيش
والوجع ما يعيش فيك
وتطلع من كل خذلان
بقلب اهدى من اللي فيك
وتعرف انك مش لازم
ترضي كل اللي حواليك
يكفي تكون راضي عنك
وانت واقف قدام عينيك
علاج الروح يا صاحبي
مش انك تنسى اللي فات
علاجها تعرف تكمل
من غير ما تعيش في الذكريات
وعلاجها قلبك يفضل
رغم الوجع لسه حنان
وتقول للدنيا مهما قست
انا لسه بخير ولسه انسان
بقلم الكاتب وشاعر البسطاء سعيدسعيدامام
