وصية الجد
بقلم الكاتب وشاعر البسطاء سعيدسعيدامام
قعدت جنب جدي وقال لي
اسمع يا ابني الكلام
الدنيا مش دايما ضحكة
ولا كل الناس امان
خليك راجل في كلامك
وخلي وعدك له ميزان
لو قلت كلمة اوفي بيها
ومتبيعش العهد مهما كان
اوعى تغرك ضحكة صاحب
ولا تفرح بكتر الخلان
الصاحب اللي وقت شدتك
يبقى صاحب مهما كان
ومتتكلمش في سيرة حد
وانت مش عارف الحكاية
كلمة تطلع من لسانك
ممكن تهد بيت وعيلة
ولو شفت عيب في انسان
استره وخليه مستور
يمكن بكرة تحتاج ستره
والدنيا دايرة في الدور
قال لي يا ابني خليك هادي
وقت ما الغضب يركبك
مش كل كلمة تتقال
ولا كل حد يستفزك
ولو رزقك ربنا بمال
اوعى المال يغيرك
افتكر زمانك لما كنت
محتاج اللي يطمنك
وساعد اللي محتاجك
من غير ما تمن عليه
الخير لو خرج من قلبك
ربنا عمره ما يضيعه
ولو امك نادت عليك
قوم قبل ما تقول حاضر
دي اللي سهرت ليالي
عشان تشوفك بقى قادر
وابوك لو شاب شعره
خليه فوق راسك تاج
اللي شال همك وانت صغير
يستاهل منك احتياج
ومتبصش لجيب جارك
ولا تحسد رزقه يوم
يمكن هو عنده هموم
وانت شايف بس النعوم
ولو دخلت بيت ناس
خليك دايما ابن اصول
بص في الارض من ادبك
ومتدخلش في الفضول
ومتصاحبش اللي يبيعك
اول ما يشوف مصلحة
ده الصاحب وقت المصايب
مش وقت الضحكة والفسحة
ولو اتجوزت يا ابني
اختار قلب قبل الجمال
اختار واحدة بنت اصول
تعرف معنى البيت والعيال
ولو مراتك صانت بيتك
اوعى يوم تكسر خاطرها
دي شريكة عمر كاملة
مش خدامة تحت امرها
ولو حصل بينكم خلاف
خلي العقل هو الحكم
البيت لو دخله العناد
يطلع منه الحب والرحم
وخلي بالك من لسانك
ده سلاح من غير سنان
ممكن يرفعك للسما
وممكن يوقعك في ندمان
ولو جار عليك الزمان
اوعى تقول خلاص انتهيت
الراجل وقت الضيقة
يبان معدنه لما يفوت
واعمل الخير يا ابن ابني
حتى لو محدش شاف
ربك شايف كل خطوة
ومش بيضيع تعب انسان
وسيب الدنيا لاصحابها
دي محطة وهتعدي
خد منها زادك الطيب
وسيب فيها سيرة تعدي
بص لي جدي وقال لي
يا ابني دي اخر نصايح
اللي يمشي على اصوله
مش هتخوفه الجرايح
قلت له هحفظ كلامك
وهخليه جوايا نور
قال لي ساعتها يا ابني
تبقى من اهل الاصول
قلت له يا جدي كمل
لسه في ودني كلامك
قال لي العمر لو طال بينا
هسيب الدنيا على مقامك
وسكت جدي لحظة
وبص للارض وقال
خلي الناس تفتكرك بالخير
ده هو اغلى مال
بقلم الكاتب وشاعر البسطاء
سعيد سعيد امام
