الرش ....الرش
كل كلمة ليها نغمة
وحروفها متراس
أنا ما بايع ماشاري
ما خاين حد
ما عاطي صوت ما معيط
على اللاص
وأنت ايه أنت لا تكون دمدومة
كون مع الحق
لا تكون في فران الدنيا ﯕــــــــــــــــــلاَّس
كون واقف حسكة
على حوضك عساس
كون عتلة وفاس
الصابة غلَّة والحصاد محبة الناس
زريبة الذياب لا تدخلها
والمرا الحرانة المنانة لا تعاشرها
غدا يسكنك الوسواس
لا تبيع هنا ولهيه قلبك
لا تعطي صوتك
في سوق لعبيد
غذا ماتعرف رجليك من الراس
هذا طلع على كتافك
هذا البارح واعدك
ملي وصل القبة
واستحلى فارة الكرسي الدساس
على بطانتك على احلامك عفط وداس
في باب البار..بلا أمان
ريحتك ساس
عشيري الحرف ركيزة وساس
الحرف معنى و قياس
الحرف صرخة
ميزان على مقام العطفة بايت عساس
الحرف مرايا يغطي لعرايا
الحرف وعد محبة
بلا سبة في قلوب لغرام يتربى
الدار دارك عشيري دير ناظارك
الحرف راه فتيلة وقرطاس
لا تخطب يا عمري معيوفة
لا تعشق شياطة لعراس
لا تدير خير في حرامي
ما يﮕر فيه قص ولا لباس
عشيري في المحنة
نفس الوجوه طالعة
وحتى شمعة ما شاعلة
ماينفع عيط ماينفع تجمع
وجه لمدينة بخيط
درﯕ الواطي بحيط
عشيري في المحنة
فلاس هاذ العالم فلاس
شبيهي فيق ذوق المعنى
البرلمان إشاعة
ولحزاب شواري ذبان
كثروا بلا قياس
عشيري لا تعيرني
باحماق الناس
راه ماحد لحزاب تقاقي
والبيض يغلا
ماحد صوتك الباح
في البورصة طايح
غذا يطلع ليك البيترول للراس
دمك يشروبوه
مع البرقوق وعصير البسباس
عشيري شوفني بعينيك
في قاع الكاس
وإلى ظلام الحال وما جيتك في البال
راه فلاس هاذ العالم فلاس
كلشي إشاعة
كلشي إذاعة
الحب العدل الديمقراطية
الصحة عند الصندوق الدولي
عا بضاعة
فلاس خيي هاذ العالم فلاس
وحدو دم بنادم رخاص
الرش.. الرش قربقبوا
سوارت الرباح
المواطن في زريبة الذياب
عمروا مايرتاح
عادي عادي ياعبد الهادي
الوطن يأسفاه للهاوية غادي
محمد كابي
الجديدة في : 19/09/2026
