كحلت بيك عينايا
وقلت دبا تزيان لّيام
رمتيني ف دشور منسيه
وحرقتيني بنار لغرام
انا اللي جيتك بمشموم ف يديا
وبظلك فتلت مضمة وحزام
وشحال كنت فيك معميه
ودبا درتها بين عينايا وشام
خيطت جراحي بيديا
وحرمت بنا يدوز سلام
الطعنة منك كانت قوية
عند بير لغدر سلا لكلام
شربت من كاس غرامك لوهام
نزل على قلبي كثلة سقام
كنت حاطك ف مقام عالي
نطير بحلامي كيف لحمام
ودبا خديت درس قاسي
وطويت كتاب لحزان
بقلم نزهة رصين
