زجل ....طبول الݣلب ....
طبول الݣلب سهرانة
سايرة تندب ع لي فات
ف لودن دݣة طنانة
ودموع العين تبكي ع لي مات
لا راحة فيك آ دنيا
ولا طير جبرها ف سماك
ايامك حارة كية
وانا فيها نجري م وراك
همي فيك يا دنيا
هم اليتيم ف رغيف عشاه
وهمك فيا يا دنيا
مثل خروف والديب وراه
مرة تحنّي يا دنيا
وعشرة تعطي بݣفاك
ومرة تشنّي يا دنيا
حرب ع لي يضحك معاك
غدارة يا دنيا
وغدرك ف لي تاق ف هواك
ايامك سنارة يا دنيا
وحنا فيها طُعم فجواك
غابة انت يا دنيا
فيها حنا حطب ل غداك
ولي منشارو حافي يادنيا
ما جنا من غلة جنّاك
طبول الݣلب يا دنيا
سهرانة ف ليل حداك
تندب ع لي فات يادنيا
ما فرح غ لي بالعود عماك
محمد الادريسي
