يا صبر
🎶🎶🎶🎶
يا صبر مالك ليه كدة
سايبني وحدي متنكدة
ودموع ليلاتي ع الخد دة
وحالنا يصعب ع العدا
أنا كنت ليك مسلمة
راضية بحالي مطمنة
ولا كانت حياتي مضلمة
بكرةو عندي مليون أمل
بتخل بوعودك ليه كدة
أنا كنت واقفة علي أرض ثابتة
ولا أي هوجة مرة عدت ،،،
سابت علامة يوم وهدت
كنا صحاب أيام زمان
بينا وعود و هدنة وأمان
تيجيني أزمة وسنين عجاف
ألاقيك في ضهري دراعين لطاف
دموعي تجري ما بين ضفاف
تشد عودي أقف ما أخاف
راحوا حبايب أهل وقرايب
أصحاب تفارق وكانوا حبايب
والفرح يهجر والغدر جايب
طوق كان بيلمع يزين رقاب
زغلل عيونا
واتسرسب ما بان
و في الزحمة غاب
صبح حبل خانق في دوامة الحياه
وسم خارج من بين الشفاه
أصبح خناجر تجزر معالم
معالم طيبتنا
ويا راحتنا
ويمكن حياتنا
طوفان نار ما خلى
أخضر ويابس ومستخبي
دالكل راح منه ما ولى
قابلت شدة ووراها شدة
ألاقيني شامخة راضية وأبية
وأقول ،،،،،،،
ربي بالخير فاكرني
وألاقيه راحمني وزرعك في قلبي
عشمي أكون من أهل ظله
آلام كتير رافضة تفارقني
وعيون وناس تتشفي فيا
ولما احكي يوم وأقول أفضفض
أرجع وأندم وأتوب لربي
واجهت بيه كل الصعاب
كنت قوية لو مرة غاب
وأقول يارب ارحم لي ضعفي
وإن كان د ذنب يبقي أرضي عني
وإن كان ترقي يبقي من بختي
يارب راضية بكل خيرك
بس النهاردة يا صبر مالك
عاوز تسيبني وتحل عهدك
عاوز تسيبني وتحل عهدك
😢 بقلم.. أميرة الغرباوي 😢
🎶🎶🎶🎶🎶