محمد الإدريسي زجال
زجل.... المنظر.....
ݣرݣر يا لحمام ݣرݣر
وصل سلامي للناس
صور لي هاذ المنظر
وݣولو بكل احساس
علي بجناحك وفرفر
ݣول ليهم راني لباس
خود من لمحبة ودردر
فاض الݣلب بلا قياس
على كل حبيب سرسر
دوقو من طعم الكاس
ݣرݣر بضرك وهضر
الصبر يطير النعاس
لعمر فالكسدة يجرجر
والشيب عمر الراس
الدنيا بحر يخرخر
وانت ما ناك غطاس
قطع النفس وقرقر
فالخاطر ؤ حد الباس
إلى جاتك الضحكة كركر
بين ضرس الراس
والى جاتك البكية شرشر
بدموعك واسقي لغراس
هذا زمان حار يقهقر
وانت عصى فيد الفاس
الضربة ع الشجر المعرعر
تهرس لو جدر الساس
والضرب على ظهرك معنصر
وانت فالوقت راك تسايس
كلاو اللحم المبخر
خلاو غ الفوطة والطاس
لي شفتيه ظلم ؤ منكر
ولي شفتو حلم فالنعاس
حمام يصلي ويݣرݣر
ويݣول راني لباس
14 12 2023
