اوعى تدمَّع
اوعى تدمَّع وانا قدامك
اوعى ده دمعك غالي عليا
لو ف آلامك او ف هيامك
ف الحالتين بيعِزّ عليا
دانا يا حبيبي بدوب ف غرامك
قلبي شاريك ومعاك يا عنيا
كل الدنيا ما تسوى يا عمري
انك تزعل بس شويه
لو دمعت وشفتك دوغري
دمعي بينزل سيل ف عنيا
دمع عيونك نقطة ضعفي
اوعى تسيبهم يجرحوا فيا
لما تسيل وامسحها بكفي
زي ماكون أخطأت خطية
مهما كلامي يزيد او وصفي
مش راح اقول واحد ف المية
دانا يا حبيبي حناني وعطفي
مش محتاج لدموعك دية
ولا اشواقي معاك وعواطفي
واقفين على دمعة حنية
خلي البسمة دي تملى عيونك
اوعى الفرحه تكون مخفية
خلي الشوق كحلات ف جفونك
مش بدموع بالهنا مروية
واما بغيب عنك وارجعلك
خلي الدمعة تكون منسية
دانا من غير دمعات بخضعلك
دانت حبيبي وكل ماليا
اوعى لهمس دموعك تسمع
أو ف عنيك المحها بتلمع
رد عليها قولها ترجع
اوعى تدمَّع
بقلمي/ خالد جمال ٣/٦/٢٠٢٤
