متفرد
يا سلام ع الرقة يا ناس حقه
ده جمال متفرد
يا سلام ع النني اللي قاتلني
بسلاح بيهدد
يا سلام ع الخد اللي الورد
نعسان على خاله وبيمدد
يا سلام ع الحسن وع الغصن
على قد معدي ومتسيد
يا سلام ع الرمش ما يرحمش
بسهام على قلبي انا بيسدد
يا سلام ع التقل خد العقل
غاوي يأسى عليا ويتبغدد
يا سلام ع القصه وع الشعر
اللي ف سريانه تقول شعر
وتعيد وتزود
يا سلام ع الجفن اما يسلم
بيناجي القلب ويتكلم
ف قلوب العشاق بيعلم
للروح يتودد
ويا وعدي على النور ف جبينه
مانشوفشي البدر وشايفينه
بيهل بعطره ورياحينه
ف الليل بيبدد
واللمسه يا ناس سحر ف ايده
بتداوي القلب وتنهيده
بتزيح ف الهم وبتبيده
ايامي بتسعد
كل اللي انا قلته عليه شوية
ما يجيش ولا واحد ف المية
ف الحسن معدي البشرية
لا حروفي تطول ولا معانيا
لا كلام يتقال ولا اغنية
ولا وصف يحدد
متفرد
بقلمي/ خالد جمال ١/٧/٢٠٢٤
