ماتقولشي بحبك
اوعى الكلمة تنطقها شفايفك
اوعى تقولها لتبيِّن ضعفك
امحي حروفها مع كل معارفك
اصلها غالية
ليه ترخصها بخداع من قلبك
اصلها طاهرة
ليه تدنسها بزيفك وبكدبك
دانا قلبي خلاص مابقاش شايفك
وإن شافك يوم لأ مش عارفك
لو هتقولها قولها لنفسك
اصل انت اناني
مابتحسش الا بنفسك
ظالم وظلمت معاك قلبك
ماتقولشي بحبك
اصل الكلمة
مش ماشيه معاك
ولا لايقة عليك
زي الكدبة
لو تداريها
بتبان ف عنيك
حتى اللمسة
بتجرَّحني وحسيت بيها
أشواك ف ايديك
لو كت همسة
ف وداني صرخة
وبتصرخ فيها بعزم ما فيك
خاين وكرهت معاك كدبك
ماتقولشي بحبك
ابعد عن قلبي خلاص يابني
ربي يصبرني انا على جرحك
لو مهما تداري وهتخبي
من غير ما تقول كدبك فاضحك
كنت الاشواق بيها تلعبي
وقناع بيداري على ملامحك
ياللي إنت ظلمت معاك قلبي
ياللي إنت اسايا ده كان فرحك
فوضت انا فيك قلبي وربي
ولا يوم هصفالك أو اسامحك
ومسيرك تندم على ذنبك
ماتقولشي بحبك
بقلمي/ خالد جمال ١٣/٧/٢٠٢٤
