..وبأكتب لك....
بأرد عليك في جواباتي
يسلم كل خطوة ليك
من الحاسد ومالحاقد
ومن اللي شاف سمار لونك
فعتتني لان ابوك غرس فاسه
في قلب سمارك النيلي وكان قاصد..
وبأكتبلك عن الحلم
اللي بأحلم بيه ليلاتي معاك
تكون فارس على حصانك
وانا سحباه ل١٠٠ مشوار
في سكتنا ...
الخضار طارح لمدد الشوف
وفوق مدنه الحياة حلمه
صليبه هلال يكون ساجد
وبابعت لك كمان تصاوير
عن اللمة اللي نفسي
في يوم تجمعنا مع الأحباب
.ولاد. أحفاد. وأبوك وأمك وإخواتك
ولاد عمك و.بنات خالك
وجارك عم عبدالحق
صديق عمك ميلاد عابد.
وجوه الصورة فرع زتون
من الثجرة اللي
فاسك قبل ما تسافر
غرس جدرها في الحلم
فجدر جوه قلب الليل
وأستنى الأمل
ينزل عالأرض اللي
شايلة الحلم في جوفها
وحالفة تطرحه لما
يادن ليها رب الكون
بإنه يكون كما البدر
عمار وخضار ودقة زار
تلم الكل حوالينا
وفي الزفة الجميع ماشي
لحد بداية السكة
وعالصورة الإله شاهد
وهابعت لك تلت سلامات ..
سلام كافي يطمن قلبك الطاهر
بإنه العتمة مهما تطول
مسير البدر هينور طريق بكرة
وأفرح باللقا يا حبيب
وأقابلك والحنين زايد
وتاني سلام ما فيهش كلام
بإن الرحمة موجودة
وإن الخير في اولادي
وأولادك قدر ونصيب
وإن الحظ لو غتت علينا يوم
مسيرها تروق وتحلى لنا
.دوام الحال محال ده أكيد
وبكرة هترسى مركبنا
على البر اللي نفسك فيه
وتنزل عالتراب ساجد
ولما كانت التالتة أكيد تابتة
فكان فيها السلام عالكيف
يحلى مر أيامك
ويسقى الصبر
لشراقي السنين جواك .
.تعيش مستور .تموت مستور
وتلقاني في يوم الدين
عروسة حلمك الاخضر
يا كل رأس مال السنين دي
وترضية .ونعمة ربنا الواحد
بقلمي عبيرالصلاحي
من ديواني تعال أما اقولك
