ف غمضة عين
حبيبي يا ناس خطف قلبي
ملك امري ف غمضة عين
وقلبى كمان عِدِم حركة
وقال بركة وطاوعه بلين
يا ريت عرفني او قاللي
مكان قلبي وواخده لفين
ده راح وياه كده وسابني
وعذبني شهور وسنين
بايني جنابه ده ماصدق
وداس ع العهد والمبدا
وشرع سنين عليه عايشين
ده بعد ما عشت فيه اربي
واقوله اياك تفوت دربي
ييجي وياخده وف دقيقتين
كتير وعيته ونصحته
وصوتي وراه ياما نبحته
نعيم العشق نار تحته
جمال بيداري ف بشاعته
وبحر غريق و موج عالي
وانا وانت شراع بالي
لا اد طوفانه ولا جاحته
لا يوم نمشي ف روض واحته
ولا نقرب لا من دربه ولا لساحته
وكنا حلفنا يابني يمين
فرد عليا قلبي وقال
ده مهما العشق كان قتال
ومهما كلام عليه اتقال
ولو شفنا معاه أهوال
محال نستغنى عنه محال
ده كل الروعة ف اللوعة
ولو نار الغرام والعة
تئيد جوه الفؤاد ترعى
دي نار ف القلب مالها مثال
وليه نعيش
بين اسى وحرمان
يعدي العمر منا اوام
تعيش خايف من الاحزان
تكون اسف واكون ندمان
فقوم ندعي عزيز رحمن
يكون بشرى وبر امان
وننسى معاه ما عدى وكان
لقيتني وراه برد امين
ف غمضة عين
بقلمي/ خالد جمال ٤/١٠/٢٠٢٤
