حبيبي بغزالة
ده حبيبي هواه حسب الرايجة
كده حسب الموود حسب الحالة
يعني اما تكون بغزالة رايقة
تنطق وتقول أحلى قوالة
وعاديك لو كانت متضايقة
تنسى الأشواق وبتتعالى
فيه بينا خطوبة وفيه شبكة
والمهر بعته أنا ف حوالة
مش باقي يا ناس إلا الورقة
واتنين يشهدوا م الرجالة
لو يوم كت صاحية ومش فايقة
ولسوء بختي كان فيه زيارة
تنكرني تقول أنا مش فاكرة
ترقع وبصوت يملى الحارة
تمنعني ان ادخل وتقوللي
على فين يا خفيف هيه وكالة
ودي اول مرة تشوف وشي
لو مش كداب هاتلي قمارة
وإن يوم رحتله ودماغه عالية
يقابلني بلهفة وبحرارة
ويقوللي ازاي ده حصل مني
دانا ملكك دانا رهن اشارة
معلشي سامحني يا روح قلبي
مانا مش آسية ولا غدارة
شكلي اتورطت معاه ف حبي
وماظنش كده تبقى غزالة
اتاريه بيتعاطى حبوب رسمي
والعقل إن غاب ألف خسارة
وعليا بايه اظلم قلبي
ما كفاية الدنيا الدوارة
يوم تبعد عني ويوم جمبي
يوم واخده الجرعة ويوم لا لا 😃
بقلمي/خالد جمال ٢٥/١٢/٢٠٢٤
