من تحت النضارة
بستنى قدومه اما يعدي
وإن شافني بيبعد يدّارى
ماعرفشي انا ايه وياه ذنبي
يعاملني بجفوة وبمرارة
بتشد يا ناس لو فات جمبي
وده قسوة قلبه كما حجارة
وفي عز البرد ان قربلي
تحرقني النار زي سجارة
بسقيه من سيل عطفي وحبي
وساقيني غرام بالقطارة
ولا عشان جاي معاه دوغري
يلاوعني يفكر دي شطارة
ف الشارع وقفتي من بدري
مشتاقله بلهفة وبحرارة
لو حس وراه خطوة رجلي
بيسيبه وينفد م الحارة
وبتني وراه ولا روح شغلي
ما عنيه صايداني بسنارة
قررت انهيها معاه وقلبي
ماهو اما يا فيها ليتوارى
وصارحته فقاللي انا ايه ذنبي
دانا ردي عليك كان باشارة
لو ركزت ف حركة رمشي
كت ليك هتكون أحلى بشارة
كنت بعبرلك عن حبي
بغمز من تحت النضارة
بقلمي/ خالد جمال ٨/١/٢٠٢٥
