للدرجادي
للدرجادي اسيت ونسيتني
خنت ودادي وقلبك باع
مش قولتلي انك حسيتني
جاي دلوقتي تقوللي وداع
كان أهونلي معاك رسيتني
لو مركبي مرساها ضياع
أحسن ما أحلم وتموتني
تكسر فيا جناح وشراع
عيشتني لحظات مستني
فجأة اتقلبت ويل وصراع
صبحتني ومعاك مسيتني
على اوهام وجراح وخداع
ليه من إيدي عنيك شدتني
وانت ناويلي على الاوجاع
قلت لبر امان عديتني
سبتني وسط طوفان قلاب
كان أرحملي لو صدتني
لو قلبك كان رد الباب
ليه يا حبيبي وراك ودتني
سكة هوا اخرتها سراب
لا عشقتني ولا يوم ودتني
كنا اتنين عايشين اغراب
كلمة أخيرة هقولها وماشي
بعد ما قلبي ف حبك داب
زي ما حبك راح وما جاشي
زي ما شوقك كان لي ضباب
بكره تشوف الويل وتاسي
بكره هتجني دموع وعذاب
بكره هيفضى من الاسى كاسي
وانت المر تدوقه شراب
زي ما خنت معاك اخلاصي
راح تتخان من غير أسباب
بكره زمانا يكون القاضي
يحكم كده ويصفي حساب
بقلمي/ خالد جمال ٢١/٤/٢٠٢٥
