زجزاج
بتقوللي بحبك وبتحلف
وبتضحك على قلبي وتبلف
وبتبعد كل ما ليك بحتاج
وإن يوم توعدني ألقاك تخلف
لازمته ايه بقى طب حلفانك
والكدب معشش ف كيانك
وياريته معاك ليه اي علاج
غير صبري عليك أو نسيانك
بتقوللي ما ليش أحباب بعدك
والعشق ف قلبي ده ليك وحدك
وبتمشي تملي معايا زجزاج
طب غرضك إيه مني وبدك
غير عشقك قلبي مالوش سيرة
والروح ف هواك عايشة أميرة
والشوق اكليل فوق راسي وتاج
واسمع واتعجب م الحيرة
بتقول ف كلام غير أفعالك
وعاوزني أحبك واسعالك
وبتعصف زي الريح لو هاج
إزاي بقى هخلص واوعالك
مانا قلبي لقلبك ياما قال له
فاض بيه من كدبك بقى مله
ماهو لو هتكفر عن ذنبك
هتقضّي العمر صيام كله
دي نصيحة يا سيدي لوجه الله
أخلص ف هواك والكدب أنساه
لاتعيش عمرك ف عذاب وهلاك
تصحى على جراح وتنام على آه
بقلمي/ خالد جمال ١٤/٦/٢٠٢٥
