قلت غير حلمة
خير وسلام
السما غطاها الغمام
مالها مقلقة
وخيام بلا وتاد
داها العجاج
معرية على يديها
مسلمة
قلت غير حلمة
كثر اللغى والهراج
وعيون مشرارة مسهمة
وقلوب كحلة
بالعيب محزمة
كلت غير حلمة
شفت النية حشمانة
مقندشة غضبانة
وقلة النية
لابسة لوهام
عاجبها الحال
جاتها عل الكانة
والحال يجر حال
دار ف العمر حالة
فرق حباب
جرى ف العذاب
اش تدي من الجرانة
غير البطانة
كلت غير حلمة
خفت نفيق من الحلمة
لقى راسي ف حلمة
الله يحفظنا
من هاد المنامة
كلت غير حلمة
بقلم نزهة رصين
1/07/2025
