مستحيل تكون يوم راجل بقلم
ابن الخضراء عبدالله العمراني
بعد العز ما انطيق المذلة
ولا الرخص في عيونك ياجاهل
ولو تمنحني المال الكله
اللعب بشرفي ماهو ساهل
اتخون العشرة باب اتحله
على روحك فيه تقعد واحل
تضرب قلبي هواه اتسله
واتغيضه بغدرك بالباطل
وحلمي امعاك تفنيه ابعلة
انت عشقي ليه القاتل
ليش غرامي بيك اتشله
وتعمل بيني وبينك فاصل
نكرت في معروفي ابزله
وطامع ننسى ولية اتقابل
فعلك شين ماهو افمحلة
بعد العز هيك لية اتعامل
ظلمك لية مايتجللا
طول عمري ثأثيره جاعل
قلبي فيه مفتوحة فللا
صعيب غلقها ووجعها شايل
وريقي انت معاد اتبله
قضيت على حبك بالكامل
فعلك خارج شرع الملة
حرام تلمسني انت سافل
تبريت منك قدام الله
بريئة منك طلعت هامل
انت اللي جبت المذلة
ماكنتش امعاية عاقل
شريت النفسك ڨرابللا
خلاتك مهزوب وعاطل
انت منجوس وبورجلله
شين فعلك بيه اتعيش شاعل
لو كنت طايع أمر الله
ما فكرة تمحي الأواصل
لكن انت طلعت عتللا
ما ترغب فيك القوافل
منبوذ ومكروه الطلة
مستحيل تكون يوم راجل
