خليتني بجرحي نتلذى بقلم د
ابن الخضراء عبدالله العمراني
خليتني بجرحي نتلذى
وقلبي من داخل محروق
لا نتغدى ولا نتعشى
وسالبني من كل احقوق
نسيت ايامك كنت تتحنى
باش نرضى عليك يا مخلوق
ماشي في بالك نتوفى
ومعاد يصبح عني اشروق
أنا غلاية موحال يتوطى
ولا ينزل سومي في السوق
أنا أهلي علي ماتتخلى
وشرفي عالي ديمة الفوق
يجيك يوم وتقعد تتبكى
وايامك فيها مخنوق
ومن وضعك للناس تتشكى
في شر افعالك مدقوق
وجرحك غاير فيك ويرعى
في خيالك يدمي ويعوق
أنا حياتي عند بابا أحلى
خير مامعاك قلبي محروق
أقعد وحدك اتعب واشقى
ومن ماعملت نفسك ذوق
للعذاب طاوع واسترخى
من ليعته معادش مطلوق
