" أنا
عايزْ
مُعْجِزَة
للبلياتشو !!
تايهْ أنا مِحْتارْ و الدنيا تعباني
مليانة بالأفكار وتَملي هَزْمَِاني
ألاعبها لِيلْ ونهارْ تِفرحْ لأحزاني
معقولة هي الدارْ ولا دي سجاني!!
بَفْرِشْ مَشاعري خَضَارْ تِبعدْ وتِنساني
وجوارحي لِيها مزارْ والله مَجَاني
طعم الحياة صبارْ مَرارِتها بلساني
لو خَيروني أختار عُمري ما أعُود تاني!!
واهرب ف لمح البصر وأندهْ واقولْ يا زماني
إزاي بس البشر يعشق حبة ثَواني
و فين راح المطرْ ومين واخِد مَكاني
وإيه هوَ القدرْ إلا تجديد أماني!!
حُر وطليقْ أنا خارج يَدُوب م الغِيب
نِفْسي أطُول السما بس مِلاحِقْني الشِيب
بَرْجَع واقُول رُبما يُقُولولي بَطْلْ عِيب
كلامك فيه نَمنمَة ربكْ يقينْ مِشْ رِيب!!
أنا عايز مُعجزة تِرْجَعْ بِيها حياتي
مَتْكُونش مِعَجِزَة زي اللي عاشها حالاتي
أنا صاحبْ رسالة ورِسالتي كِوَيسة
عايش بمليون حالة وجيوبي مفلسة!!
سافرتْ كمان الخالة والخالة مُخْلِصَة
زي النجوم والهالة في حُضورْها مُؤنِسَة
لو كنت صاحب فِكرْ لازم تِدُوق الألم
المال علِيهُمْ حِكْر والورقةَ والقَلم!!
جرحي ملوش غير دوا أرسم حياتي خيال
ما بين طواحين الهوا أدخُل واقُول يا عِيَال
جايز نِقُول يُوم سَوا اللي ما عُمْرُه اِتقَال
جايز بُساط الهوى لسه ف خُيوطُه آمال!!
وارجع واقُول يا عبيطْ أصلْ الحياة دي رِواية
وفصُولها بَكَرة خِيط نِسحب بدون نِهاية
نخبطْ جدارْ الحِيط ونْعِيد نَفْس البِداية
عيشنا الحياة شخابيط والأصلْ لِينا غَاية
مرة نُكُون عفاريتْ مرة نِعُود بِهْداية
ألوان كتير كتاكيت والدُنيا حِداية
كل البيوت حواديت كل البشر له حكاية
نعيشها ليه توابيتْ مَنْكُون لِبَعضْ مِرَاية
شعر عامي
للبلياتشو
وليد حسانين
12_ 11 _ 2023
القاهرة / مصر
وليد عوض إبراهيم حسانين/
