ما بين ايديك الامان
بقلم الكاتب وشاعر البسطاء
سعيد سعيد امام
متخليش بكرة ياخد منك حلاوة زمان
ولا تخلي خوفك يهزم فيك الامان
الدنيا يوم بتدي ويوم بتاخد كمان
واللي فاهم لعبتها يعيشها باطمئنان
متبنيش فرحتك على كلام كل انسان
ولا تربط راحتك برضا فلان وعلان
خلي قلبك ابيض وعقلك صاحي كمان
واعرف ان السكوت ساعات بيحفظ كرامة انسان
ولو قابلت في طريقك واحد غدر وخان
متردش الغدر بغدر وتبقى زيه كمان
خلي اصلك سابق خطوتك في كل مكان
واللي يزرع طيبة يحصد طيبة في كل زمان
متستعجلش رزقك مهما طال الزمان
يمكن التأخير رحمة وانت مش شايفها كمان
ومتندمش على باب اتقفل من زمان
يمكن وراه طريق يحفظك من حرمان
ولو حلمك اتعطل متقولش خلاص انتهى
الحلم اللي له صاحب عمره ما يضيع هوان
قوم من مكانك وخد خطوتك كمان
وخلي التعب شاهد انك كنت انسان
ولو الدنيا شدت عليك وقالتلك استكان
قول لها لسه في قلبي امل وايمان
مش كل خسارة نهاية ولا كل كسب امان
ومش كل قريب قريب ولا كل بعيد نسيان
خليك جدع بس متديش قلبك ببلاش لان
اللي يصونك صونه واللي يهينك سيبه في مكان
وصاحب اللي وقت الشدة تلاقيه جنبك كمان
مش اللي وقت الضحكة حواليك مليان
وخلي كلامك ميزان قبل ما يطلع للسان
كلمة ترفع انسان وكلمة تهد انسان
ولو ربنا اداك متنساش اللي كان
افتكر اللي وقف جنبك وانت في اول الميدان
اصل الدنيا بتلف ومحدش فيها ضمان
واللي فوق النهارده بكرة ممكن يبقى في مكان
وفي اخر الطريق مش هيفضل غير سيرة انسان
يا ترى عاش بضمير ولا عاش طول عمره ندمان
فخلي اثرك طيب وخلي قلبك في امان
وامشي في الدنيا بسيط وكريم وانسان
لان اجمل مكسب مش فلوس ولا مكان
اجمل مكسب تسيب وراك قلب بيقول كان انسان
بقلم الكاتب وشاعر البسطاء
سعيد سعيد امام
